काठमाडौं । नेपाल ललितकला पत्रकार समाज र तारागाउँ म्यूजियमको आयोजनामा प्रत्येक महिनाको दोस्रो बुधबार ‘कलाका कुरा’अन्तगर्त माघ महिनामा पौभा कलाकार पुर्णप्रसाद ह्योजुसँग संवाद कार्यक्रम गरिएको छ । सञ्चारकर्मी संगीता श्रेष्ठले ह्योजुसँग संवाद गरेकी थिइन् ।

विगत ३५ वर्षदेखि पौभा कलाका क्षेत्रमा निरन्तर लागेका ह्योजुले स्कूले जीवनबाट कला क्षेत्रमा लागेको बताए । कला यात्राको सुरुवाती दिनमा उनले परम्परागत पौभा कला त्यसमा पनि १२ देखि १७ औं शताब्दीसम्ममा बनेका पौभाका शैैलीमा कलाकृति बनाएको बताए । आफुमा निखारता बढदै गएपछि उनले आफ्नो मौलिकपनसहित पौभामा आफ्नो परिचयलाई स्थापित गरे ।
उनले नवदुर्गा नाच र बिस्केट जात्राका रथका प्रतिकृति बनाउँदै र स्कूले जीवनमा विभिन्न देवदेवीका चित्रको नक्कल गर्दै आफ्नो कलाकारी यात्राको सुभारम्भ गरेको बताए ।विभिन्न राष्टिय तथा अन्तराष्टिय कला प्रदर्शनीमा सहभागिता जनाएका उनले राष्टिय तथा अन्तराष्टिय रुपमा विभिन्न सम्मान र पुरस्कार समेत पाएका छन् ।

पौभा नेपालको पुरानो कला शैली हो । बुद्ध र हिन्दु धर्ममा आधारित रहेर बनाउने यो कला शैलीले नेपाली कलालाई विश्वमा चिनाउन सफल रहेको छ । १८ औं शताब्दीसम्म पौभा कलाको नेपालमा चरम विकास भएको तर १९ र २० शताब्दीमा यो कलाको विकासमा हा्रस आएको ह्योजुले बताए । अहिले यसको व्यवसायिकतादेखि प्रचार प्रसार र कलाकारका काममा पनि नयाँ शैली भित्रिएको उनले जनाए । आधुनिक कलाको प्रभाव पनि पौभा परेको र यो विकासको आफ्नै तरिका भएकाले पौभामा शैली र चिन्तनगत रुपमा पनि नयाँपन आएको उनले स्वीकार गरे ।
नेपालको मौलिक कला शैलीको रुपमा परिचित पौभा कलामा लागेर सफलता हासिल गरेका कलाकारहरुमध्येका ह्योजुका कला अहिले विश्वका विभिन्न संग्रहालयमा संग्रहित रहेका छन् । चित्र कोर्न थाल्दाथाल्दै उनका चित्र अग्रिम बुकिङ्ग हुने उनलाई नजिकबाट चिन्ने अर्का पौभा कलाकार सुन्दर सिंखवालले जनाए । नेपाली पौभा कलामा ह्योजुले लामाो समयदेखि काम गरेको र शैलीमा पनि आफ्नैपन देखाउन सफल रहेको तारागाउँ म्यूजियमका निर्देशक रोशन मिश्रले बताए । कार्यक्रममा कलाकार तथा कला लेखक नगेन्द्रप्रसाद पौड्याल, पत्रकार श्याम रिमाल, समाजका अध्यक्ष केशव राज खनाल, सञ्चारकर्मी विनिता मरहट्टा लगायतले ह्योजुको कलाकारिता र नेपाली कलाका बारेमा जिज्ञासा राखेका थिए ।