काठमाडौं, १२ भदौं । पत्रकार तथा गीतकार डब्बु क्षत्रीले आफ्नो जन्मदिनको अवसर पारेर नयाँ गीतिसंग्रह ‘गुलाबी स्वरहरु’ सार्वजनिक गरेका बजारमा छन् । यसअघि एकल गजलसंग्रह ‘झरी’ ल्याएको क्षत्रीको यो दोस्रो एकल गीतिसंग्रह हो ।
आईतबार राजधानीमा एक समारोहबीच छायाँछबी क्रियसनका अध्यक्ष एवं पत्रकार शान्तिप्रिय, संग्रहका गायिकाहरु निशा देशार, केन्जुमा सुब्बा, रेश्मा पुनमगर, साहिमा श्रेष्ठ, संग्रहको भिडियोकी मोडल सृष्टि तामाङलगायतले एल्बवको बिमोचन गरेका थिए ।
पत्रकार शान्तिप्रियले कार्यक्रममा बोल्दै गीत लेखनमा अढाई दशकदेखि सक्रिय डब्बु क्षत्रीले बिगतमा गम्भिर गजल तथा गीत ल्याएको बताए । तर यस पटक नयाँ पुस्तालाई लक्षित गरेर सबैले गाउन सक्ने रोमाञ्चकारी पप शैलीका गीतहरु उनले पस्किएको शान्तिप्रियले प्रकाश पारे ।
कार्यक्रममा बोल्दै सँग्रहका सँगीतकार ज्योतिप्रकाश बिक, जुगल डंगोल, सन्तोष श्रेष्ठ र दीपक शर्माले गुलाबी स्वरहरु भित्रका गीतहरु र ती गीतमा आफ्ना सँगीत बारे कार्यक्रममा चर्चा गरे ।
गीतकार डब्बु क्षत्रीले आफ्नो यो दोस्रो एकल गीतिसँग्रह भएको बताउँदै सबैलाई सुन्दा रोमाञ्चकारी तुल्याउन प्रकारका गीतहरु सँग्रह गुलाबी स्वरहरु मार्फत ल्याएको बताए ।
सँग्रहको पाँच गीतमा बेबी आई लभ यु…, जिस्किन मन लाग्छ…, यो तन यो मन…, तिमीसँग बोल्न…, दोषी त नजर…रहेका छन् । यीत गीतलाई केन्जुमा सुब्बा, निशा देशार, सहिमा श्रेष्ठ र रेश्मा पुनमगरले गाएका हुन् । गीतिसँग्रहलाई बितरण बिन्ध्यवासिनी म्युजिकले गर्दैछ ।
सोही कार्यक्रममा सँग्रह भित्रको गीत दोषी त नजर नै थियो…को भिडियो पनि सार्वजनिक गरियो । डब्बु क्षत्रीले नै निर्देशन गरेको यो भिडियोमा अभिनेता नविन लम्साल, मोडल एवं नेपाल नेक्स्ट सुपर मोडलकी बिजेता सृष्टी तामाङ, मोडलद्धय देबिका कार्की र कुशल पाण्डेले अभिनय गरेका छन् । राजु केसीले खिचेको सो भिडियोलाई सुप्रिम पराजुलीले सम्पादन गरेका हुन् ।