काठमाडौं । हास्य व्यंग्यमा पर्यायवाची मानिन्छन्, मह जोडी अर्थात् मदनकृष्ण श्रेष्ठ र हरिवंश आचार्य । हास्य कलाको माध्यमबाट नेपालीको मन मस्तिक परिर्वतन गर्ने अभियानमा यो जोडी लामो समयदेखि सक्रिय छन् । सबै नेपालीको मन–मुटुमा बस्न सफल मह जोडीलाई नेता, अभिनेता र जनता सबैले सम्मानको दृष्टिले हेर्ने गरेका छन् । नेतालाई सचेत, अभिनेतालाई स्नेह, सुझाव र जनतालाई सकारात्मक सन्देश दिने यो जोडीलाई सम्झिनेहरुको संख्या कम छैन । टेलिशृंंखला, नाटक, प्रहशन, हाँस्यव्यंग्य होस् वा गीतसंगीत यो जोडीले आमनागरिकको आँखा खोल्ने काम गर्दै आएको छन् ।

यसै क्रममा यो जोडीले अर्को एउटा यथार्थपरक तथा सन्देशमूलक गीत सार्वजनिक गरेका छन् । जुन गीतले गतिलो नेता नपाउँदा देश पछाडि परेको सन्देश दिएको छ । यसको साथमा गीतले ‘हाम्रो भन्दा पनि राम्रो नेता’ छान्नु पर्नेमा जोड दिइएको छ । मह जोडीको शब्द, संगीत र स्वरमा रहेको यस गीत यस्तो छ । (भिडियो हेर्नुहोस्)