विश्वकै कान्छा फिल्म निर्देशकका रुपमा गिनिज बुक अफ वल्र्ड रेकर्डस्मा नाम र्दाता गराएका  नेपालका सौगात विष्टले नेपाली दर्शकलाई चुनौती दिएका छन् । राजधानीमा शुक्रवार आयोजित कार्यक्रममा बोल्दै उनले नेपाली दर्शकले आफूलाई नपत्याए पनि विश्वले पत्याएको बताएका हुन् । उनले आफूलाई बोल्न मन लागेको भन्दै बालसुलभ शैलीमा बताए, ‘नेपाली दर्शकले फिल्म हेरिदिएनन्, विश्व रेकर्ड राख्ने फिल्म हेर्नु पर्छ कि पर्दैन ।’ सञ्चारमन्त्री मिनेन्द्र रिजालले प्रमाणपत्र हस्तान्तरण गर्दै उनको प्रतिभाको प्रशंसा गरेका थिए ।

७ वर्ष ३४० दिनको उमेरमा ‘लभ यु बाबा’ निर्देशन गरेका सौगातले यसअघि भारतका कृष्ण श्रीकान्तले नौ वर्षको उमेरमा राखेको कीर्तिमानलाई उछिन्दै गिनिजमा नाम लेखाएका हुन् । कन्नडका श्रीकान्तले सन् २००६ मा ‘फुटपाथ’ शीर्षकको फिल्म बनाएर गिनिजमा रेकर्ड कायम गरेका थिए ।
श्रीकान्तको फिल्मले स्कुल जान खोज्ने अनाथ बालको कथा पेश गरेको थियो भने सौगातले निर्देशन गरेको फिल्म ‘लभ यु बाबा’ले आफ्नो दस वर्षीया छोरीलाई हुर्काउन एउटा बुबाले गरेको प्रयत्नलाई विषय बनाएको थियो । फिल्ममा सौगातकै बुबा गजित बिष्ट र दिदी संगम विष्टले मुख्य भूमिकामा अभिनय गरेका थिए ।
गजितले लामो प्रयत्नपछि गिनिजले सौगातको कामलाई रेकर्डको रुपमा स्विकारेको जानकारी गराए ।

‘गिनिजले १७ वटा देशको गाइडलाइन दिएको थियो । उसले दिएका गाइडलाइन अनुसार हामीले ५०० जति कागजात प्रमाणका लागि पठाएका थियौं । करिब एक महिनाअघि गिनिजले हामीलाई सौगातको काम आधाकारि रहेको जानकारी दिएको थियो । सर्टिफिकेट चाहिँ हामीले सोमबार पाएका हौं,’ गजितले भने । उनले गिनिजको औपचारिकतासँगै जिन्दगीको सबैभन्दा कठिन परीक्षा पास गरेको अनभूति भएको जानकारी गराए ।
कान्छो निर्देशकको रुपमा रेकर्ड बनाउन सफल सौगातले गिनिजले दिएको औपचारिकतासँग थप जिम्मेवारी बढेको अनभूति भएको बताए । ‘निश्चय नै खुशी लागेको छ । हामी सबैको लामो समयको प्रयत्नले सार्थकता पाएको छ । निर्देशनलाई नै निरन्तरता दिने सोच छ । अबदेखि हरेक दुई वर्षमा एउटा फिल्म निर्देशन गर्दै जाने योजना छ,’ सौगातले भने ।
सौगात घट्टेकुलोस्थित सूर्योदय स्कुलमा कक्षा दुईमा पढिरहेका छन् । शुक्रबार औपचारिक कार्यक्रम गर्दै सौगातको गिनिजको वल्र्ड रेकर्डका बारेमा जानकारी गराउने कार्यक्रम रहेको छ ।
सौगातले निर्देशन गरेको फिल्म गत मंसिर २६ मा प्रदर्शनमा आएको थियो । फिल्ममा निष्मा घिमिरे, आशिष्मा नकर्मी, वसन्त भट्ट, निर्मल शर्मा आदिको अभिनय रहेको थियो ।