काठमाडौं, २४ मंसिर । आगामी पौष १५ गतेबाट अल नेपाल रिलिज हुने तयारीमा रहेको फिल्म ‘समर्पण’ले आफ्नो प्रचारप्रसारलाई तिब्रता दिएको छ । फिल्मका निर्माता र कलाकारसहितको टोलीले पोखराबाट आफ्नो देश दौडाहाको प्रचारात्मक अभियान शुरु गरेका छन् ।
फायर इन्टरप्राइजेज एण्ड मिडिया प्रालिको व्यानरमा निर्माण भएको फिल्मको प्रचार टोलीले बिहीबार पोखरामा पत्रकारसँग अन्तरक्रिया गरेको छ । पूर्व मेची देखि पश्चिम महाकाली सम्म प्रचार अभियान सुरु गरेको फिल्मका प्रस्तुतकर्ता रोजन रखालले बताए ।

‘फिल्मले युवापुस्तालाई लक्षित गरेको छ, युवाले के चाहन्छन, कस्तो रुचाउँछन, जीवनमा के कस्ता घटना भोगेका हुन्छन् भन्ने कुरामा पर्दामा ल्याउन खोजिएको छ,’ उनले भने, ‘फिल्मले नयाँ पिढी युवायुवतीको प्रतिनिधित्व गर्छ । हामीले फिल्मलाई आकर्षक बनाउनको लागि बंगलादेशको रमणिय दृश्य पनि कैद गरेका छौं ।’ उनका अनुसार फिल्म ६२ लाखको लागतमा बनेको छ ।
दौडाहा टोलीमा निर्माता रखालसहित फिल्मका प्रमुख कलाकार र मिडिया कोओर्डिनेटर कुमार आचार्य रहेका छन् । मिडिया कोओर्डिनेटर आचार्यका अनुसार पोखरापछि बुटवल, धनगढी, चितवन, हेटौडा, रौतहट, सर्लाही, दमक र धरानमा फिल्मको प्रमोसन हुनेछ ।
बसन्त निरौलाको निर्देशन रहेको फिल्ममा रोजन रखाल, रन्जु शर्मा, रुवी शर्मा, अमृत शाही ठकुरी, प्रयास तामाङ, विश्वास तामाङ, आशा भुसाल, अनु पराजुली, दीपक थापा, कुमार श्रेष्ठ, बालकृष्ण बन्झरा र ज्योति काफ्लेको अभिनय रहेको छ ।
फिल्ममा बंगलादेशी नागरिक इमरान सिद्धिकीको पनि लगानी रहेको छ भने टिकाराम रखालको लेखन, कुमार महर्जनको द्धन्द्ध, टंक बुढाथोकी र निता थापाको स्वर÷गीत÷संगीत, दीव्य सुवेदी र जयकुमार दर्लामी मगरको छायांकन छ ।