काठमाडौं, १३ मंसिर । गायक आनन्द कार्की आफ्नो १५औं गीति एल्बम ‘लभ यु फरेभर’ लिएर आएका छन् । एल्बमको शनिबार राजधानीमा बरिष्ठ गायक प्रेमध्वज प्रधान, संगीतकार दीपक जंगम, शक्ति वल्लभ, गीतकार कृष्णहरि बराल, दिनेश अधिकारीलगायतले सार्वजनिक गरे । एल्बम सार्वजनिकपछि गायक आननन्दले भने, ‘संघर्षका दिनहरूबाट चौधौँ एल्बमसम्म निकाल्दासम्म पूरा गर्न नसकेका अधुरा सपनाहरूलाई यसबाट पूरा गर्ने कोसिस गरेको छु ।’

एल्बमका सामान्य शब्दका गीतलाई पनि मन छुने गरी गाउन सक्ने कला कार्कीमा रहेको दीपक जंगमले बताए । कार्यक्रममा आनन्द कार्की र ईश्वरी कार्कीले प्रेमध्वज प्रधान, उन्नती बोहरा शीला, दीपक जंगम, कृष्णहरि बराल, शक्ति बल्लभ, दिनेश अधिकारी, सकुना श्रेष्ठलाई सम्मान गरिएको थियो ।
कार्यक्रममा गायक कार्कीबारे तयार पारिएको अटोबायोग्राफी भिडियो पनि प्रस्तुत गरिएको थियो ।
त्यस्तै शेर्पिनी कान्छीको शब्द र शिखर सन्तोषको सङ्गीत रहेको ‘सुनसान रातमा’ गजलको म्युजिक भिडियो पनि लोकार्पण गरियो । आनन्द कार्की र गायिका सन्जिवनीले स्वरबद्ध गरेको उक्त गजलमा अनिल थापा र प्रियन्का एमभिको अभिनय रहेको छ ।
‘आज फूलसँग साटेँ’ र ‘यो मन तिमीलाई दिएँ’ गीतमा गायक कार्की स्वयंले सङ्गीत दिएका छन् । साथै ‘स्वदेशी सामान प्रयोग गरौँ’ गीतमा कार्कीसँगै इन्दिरा जोशीको पनि आवाज रहेको छ । यी गीतका साथै एल्बममा ‘ए मेरी माया,’ ‘जीवनमा धेरै खोला तर्नु छ,’ ‘देखेँ जबदेखि,’ ‘छाडी जाँदै छु म सहर,’ ‘खुलेनन् कि नयन तिम्रो,’ ‘यो मन तिमीलाई दिएँ,’ ‘मरे भने प्रियसी म’ गरी दस गीतहरू समावेश छन् । गायक कार्कीले यसै एल्बमको ‘जीवनमा धेरै खोला तर्नु छ’ गीतका साथ सदाबहार ‘यी हल्लाहरू हुन्,’ ‘पर्दा पछाडि नै,’ ‘हे मेरी माया,’ ‘फुल्न त फुल्यौ’ गीतहरूको लाइभ प्रस्तुति दिएका थिए ।