काठमाडौं, ६ साउन । कुनै समय अभिनेता विराज भट्टले नेपाली चलचित्र क्षेत्रमा ‘एक्सन स्टार’ मा रुपमा चिनिन्थे । यिनै एक्शन स्टार चलचित्र ‘जय परशुराम’ मार्फत दर्शकमाझ कम्ब्याक हुँदैछन् । चलचित्रबारे राजधानीमा आयोजित कार्यक्रममा ‘जय परशुराम’ एक्शनपूर्ण रहेको बताइयो । कार्यक्रममा चलचित्रको ट्रेलरसमेत रिलिज गरिएको थियो । कार्यक्रममा एक गीतसमेत सार्वजनिक गरिएको थियो ।
अभिनेता विराजको यो कम्ब्याक करिब ५ बर्षको हो । चलचित्र ‘जय परशुरा’ मा उनलाई अभिनेता तथा निर्माता रोज राणाले कम्ब्याक गराएका हुन् । रोज निर्मित यो चलचित्र यही महिनाको अन्तिममा रिलिज हुँदैछ ।
चलचित्र क्षेत्रमा निर्माण तथा अभिनयमा स्थापित रोज ‘जय परशुराम’मार्फत निर्देशकका रुपमा समेत डेब्यु गर्दैछन् । उनका अनुसार ‘जय परशुराम’ सोचेभन्दा राम्रो बनेको छ । उनले भने, ‘यो चलचित्र मैले कुनै कसुर नराखी बनाएको छु ।’
‘जय परशुराम’ मा विराजका अलवा निशा अधिकारी र रविन तामाङको पनि मुख्य भूमिका छ । ट्रेलरमा चलचित्रका धेरै कलाकारलाई एक्सनमा उतारिएको छ । चलचित्रमा मौनता श्रेष्ठको लेखन, एनबि महर्जनको एक्सन, रामेश्वर कार्कीको छायांकन, महेश खड्काको संगीत र रामजी लामिछानेको नृत्य निर्देशन रहेको छ ।