सुबिन भट्टराईद्वारा लिखित उपन्यास ‘समर लभ’मा अब फिल्मको पर्दामा हेर्न पाइने भएको छ । यस उपन्यासमा आधारित फिल्म ‘समर लभ’ निर्माण भएको छ । जसको प्रदर्शन मिति समेत निश्चित भएको छ ।
फिल्म निर्माण टीमले छायांकनमा निस्केको करिब १ बर्षपछि ५ ओटा पोस्टर सार्वजनिक गर्दै आउँदो २५ माघमा प्रदर्शन मिति तय गरेको हो । ‘भ्यालेन्टाईन–डे’ अर्थात प्रेम दिवसलाई लक्षित गरेर फिल्मको प्रदर्शन मिति तय भएको हो । फिल्म रिलिजको ठिक ७ दिनपछि प्रेम दिवस छ । सार्वजनिक पोस्टरहरुमा फिल्मका मुख्य कलाकारहरू सुरज सिंह ठकुरी, नम्रता सापकोटा, आशिष पिया र रेवती क्षेत्री फिचर छन् ।
‘नाई न भन्नू ल–३’ जस्ता चर्चित फिल्म निर्देशन गरेका मुस्कान ढकाल यस फिल्मलाई निर्देशन गरेका हुन् । यस फिल्मबाट आशिष पिया र रेवती क्षेत्रीले नेपाली सिने उद्योगमा डेब्यु गर्दैछन् । आशिषले म्युजिक भिडियोमा अभिनयदेखि केही बिज्ञापनामा काम गरेका छन् । रेवती भने भारतको मिस इन्टरनेसनल विजेता साथै ‘ग्याङग्स अफ नर्थवेस्ट’, ’खातुन’, ‘ह्याप्पी फिर भाग जाएगी’ जस्ता फिल्ममा अभिनयको अनुभव गरेकी छन ।

सुबिनको कथालाई सामीप्यराज तिमल्सेनाले पटकथामा ढालेका हुन् भने फिल्मको संवाद सुबिन र सामीप्य मिलेर लेखेका छन् । नाइटिंगेल इन्टरटेनमेन्टको ब्यानरमा निर्माण गरिएको फिल्ममा खगेन्द्र श्रेष्ठ र इन्दु भण्डारी निर्माता रहेका छन् भने बिनोद अधिकारी कार्यकारी निर्माता रहेका छन् । स्वपन सरकार र मनोज बिक सहनिर्माता रहेको फिल्ममा एकराज तामाङ लाइन प्रोड्युसर रहेका छन् । पुष्पन प्रधानको संगीत सञ्जय लामाको छायांकन रहेको फिल्म अर्जुन जिसीले सम्पादन गरेका हुन् ।