बलिउड अभिनेता अभिनेता गोविन्दा नेपाल आएका छन् । उनी आइतबार राजधानीमा हुने ‘एलजी सिने सर्कल अवार्ड–२०७५’मा सहभागिता जनाउन यहाँ आएका हुन् ।
शनिबार काठमाडौं आइपुगेका उनीसँगै छोरी टिना पनि छिन् । बिहान साँढे १० बजे काठमाडौं ओर्लिपछि यी अभिनेताले भने, ‘नेपाल मेरो ससुराली पनि हो । मलाई सबै नेपाली आफ्नै जस्तो लाग्छ ।’ त्रिभुवन अन्तर्राष्ट्रिय विमान स्थलमा अवतरण गरेका गोविन्दालाई स्वागत गर्न अवार्ड आयोजक संस्थाका अध्यक्ष दिनेश डिसीलगायतले स्वागत गरेका थिए ।

अभिनेता गोविन्दाले विमान स्थलमा आयोजित पत्रकार सम्मेलनमा बोल्दै आफू पहिले पनि नेपाल आएको तर औपचारिक रुपमा नेपाली फिल्म क्षेत्रको कुनै कार्यक्रममा सहभागी हुने यो पहिलो अवसर भएको बताए । उनले भने, ‘नेपाल प्रेम र साहसको देश हो । म सम्पूर्ण नेपालीप्रति सद्धभाव प्रकट गर्छु ।’ पत्रकारले नेपाली बोल्न आउँछ भनि प्रश्न् गरेका थिए । जवाफमा उनी नेपालीमा बोल्दै भने, ‘अलि अलि आउँछ तर बुझ्न चाहीँ सबै बुझ्छु ।’
अवार्ड कार्यक्रममा सहभागीपछि उनले पशुपतिनाथको दर्शन गर्ने कार्यक्रम तय गरेका छन् । साथै, अवाड आयोजकले उनलाई चन्द्रागिरी हिल्सको समेत अवलोकन गराउने भएको छ ।