बलिउड अभिनेता सञ्जय दत्तको जीवनीमा आधारित फिल्म ‘सन्जु’ यही शुक्रबार अर्थात २९ जुनमा रिलिज हुँदैछ । फिल्म रिलिजको पूर्वसन्ध्यामा अभिनेत्री मनिषा कोइरालाले ‘सन्जु’को आफ्ना केही तस्बिरहरु सामाजिक सञ्जालमा सेयर गरेकी छन् । आफ्नो ट्विटर एकाउन्टमा सेयर गरेका तस्बिरमा मनिषा निकै सुन्दर देखिएकी छन् ।
फिल्म ‘सन्जु’मा मनिषाले सञ्जयकी आमा नरगिसको भूमिका निर्वाह गरेकी छन् । सञ्जयको भूमिकामा भने रणवीर कपुर देखिँदैछन् । रणवीरकी आमा बनेकी मनिषाले फिल्म ‘सन्जु’बाट आशावादी रहेको बताएकी छन् ।

फिल्म ‘सन्जु’ हेर्न दर्शक आतुर छन् । सञ्जय दत्तको वायोपिक भएकाले पनि दर्शकलाई फिल्म कस्तो बनेको होला भन्ने कौतुहलता छ । यसैबेला फिल्मको आफ्ना तस्बिरहरु सेयर गर्दै मनिषाले दर्शकलाई ‘सन्जु’ एकपटक हेर्न आग्रह गरेकी छन् ।
मनिषाले भारतीय मिडियासँग कुरा गर्दै भनेकी छन्, ‘मलाई नरगिसको भूमिका साहै्र मनप-यो । उक्त भूमिका गर्न पाउनु मेरा लागि ठूलो कुरो हो ।’ उनले आफ्नो भूमिकाबाट सकरात्मक प्रतिक्रिया पाइरहेको पनि बताइन् ।

मनिषाले सुटिङको दौरानमा कस्तो प्रतिक्रिया पाउनुभएको थियो भन्ने प्रश्नमा भनिन्, ‘सुटिङमा मलाई खाशै अप्ठ्यारो भएको थिएन । फ्यानहरु आउँथे । म कलाकार हुँ । तैमाथि एक राम्रो अभिनेताको जीवनीमा बनिरहेको फिल्ममा काम गर्दा एकदमै राम्रो प्रतिक्रिया पाएँ ।’ उनले नरगिसको भूमिका गर्दा सुरुमा नर्भस भएको पनि बताइन् । मनिषाले भनिन्, ‘म एकदमै नर्भस थिएँ । अहिले पनि नर्र्भस नै छु । फिल्म रिलिज भएपछि दर्शकको प्रतिक्रिया कस्तो पाउँछु । त्यही अनुसार खुसी हुनेछु ।’
राजकुमार हिरानीको लेखन तथा निर्देशन ारहेको यस फिल्ममा मनीषा र रणबीरका अलावा परेश रावल, विक्की कौशल, सोनम कपूर र दीया मिर्जा पनि प्रमुख भूमिकामा छन् ।