काठमाडौं, १७ साउन । अनमोल केसी अहिलेका जल्दाबल्दा अभिनेता हुन् । उनले जति चलचित्रमा अभिनय गरे, ती सबै सफल छन् । त्यसैले पनि पछिल्लो समय अनमोलसँग अनस्क्रिन रोमान्स गर्न अभिनेत्रीहरु लालायित छन् । तर, अनमोलको भागमा पनि नयाँ अनुहारमात्र जुर्दै आएको छ । हालैमात्र चलचित्र ‘गाजलु’ मा पूर्वमिस नेपाल सृष्टि श्रेष्ठसँग अनस्क्रिन रोमान्स गरेका अनमोलका लागि एउटा प्रश्न उब्जिएको थियो, ‘अबको अनमोलको जोडी को होला त ?’ तर, यसपटक पनि पुरानाले चान्स पाएनन् । यसपटक अनमोलसँग रोमान्स गर्ने अवसर अदिती बुढाथोकीले पाएकी छ । अनमोल चलचित्र ‘क्रि’ मा नयाँ अनुहार अदितीसँग देखिने भएका हुन् ।

सुवास इन्टरटेन्मेन्टको ब्यानरमा निर्माण हुने यस चलचित्रलाई द सुपर काजोल फिल्मस्ले प्रस्तुत गर्नेछ । जसका लागि ३० जना आफ्ना स्पर्धीलाई पछि पार्दै अदितीले अनमोलसँग अनस्क्रिन रोमान्स गर्ने चान्स पाएकी छन् । भनिन्छ, अनमोलले यस चलचित्रका लागि २० लाख पारिश्रमिक लिएका छन् । अनमोलले काम गर्ने सम्झौता भएकै दिनबाट निर्माणपक्षले नायिकाको खोजी गरेको थियो । नायिकाका लागि ३० जनाले निवेदन दिएका थिए ।

जसमध्येबाट १० जनालाई छानेर अडिसन लिइएको थियो । १० जनाको अडिसनबाट चलचित्रको मुख्य चलचित्रमा सुवास गिरी र भूवन केसी निर्माता रहेका छन् । कमल गिरी कार्यकारी निर्माता रहेको चलचित्रमा श्री पराजुली सह–निर्माता हुन् ।

चलचित्रको छायांकन माघबाट सुरु हुने निर्माता सुवास गिरीले जानकारी दिएका छन् । यो चलचित्रका लागि अहिले नायक अनमोल केसी विभिन्न तालिम लिइरहेका छन् । चलचित्रलाई चर्चित सम्पादक तथा चलचित्र ‘आभाष’ निर्देशन गरेका निर्देशक सुरेन्द्र पौडेलले निर्देशन गर्नेछन् ।
चलचित्र ‘क्रि’ को मेकिङ, कथावस्तुमा विशेष ध्यान दिएर काम भइरहेको निर्देशक पौडेलले जानकारी दिए ।

को हुन् अदिती ?

चर्चित ब्यानरका साथमा अहिलेका सुपरस्टार नायक अनमोल केसीसँग काम गर्न लागेकी अदिती बुढाथोकी चर्चित मोडल हुन् । उनको सामाजिक संजाल इन्स्ट्राग्राममा १ लाखभन्दा बढी फलोअर्स छन् । अदितीले हालै मात्र भारतको चर्चित म्यूजिक कम्पनी सोनी म्यूजिकबाट बन्न लागेका ३ वटा म्यूजिक भिडियोमा काम गर्नका लागि संझौता गरिसकेकी छिन् । अदितीले भारतका चर्चित टेलिभिजनका कार्यक्रमका लागि पनि आफू छनोट भएको बताएकी छिन् । भारतका चर्चित डिजाइनरका डिजाइनमा बनेका पहिरनमा विज्ञापन र प्रिन्ट एडमा पनि काम गर्न लागेको अदितीको भनाई छ । ‘कृ’को अडिसन दिएर उनी मुम्बइ पुगेकी छिन् ।

सामाजिक संजालमा समेत राम्रो फ्यान कमाएकी यी सुन्दरीले विशेषगरि, चर्चित ब्रान्डका विज्ञापनमा मोडलिङ गरेकी छिन् । हाल, उनी बलिउड चलचित्रका लागि पनि तयारीमा छिन् । झापा, दमककी अदिती हाल सिनामंगल बस्छिन् ।