काठमाडौं । गायन र मोडलिङसँगै पछिल्लो समय चलचित्र अभिनयमा क्रियाशील सुजाता केसीले निर्माणमा समेत चासो देखाएकी छन् । ‘सुर्या : द पावर’ की यी अभिनेत्रीले एक सन्दर्भमा भनिन्, ‘राम्रो कथावस्तुमा एउटा चलचित्र निर्माण गर्ने मेरो सोच छ ।’ अनौपचारिक कुराकानीमा सुजाताले चलचित्र निर्माण गर्ने आफ्नो लक्ष्य रहेको सुनाउँदै भनिन्, ‘नारीप्रधान एक्शन चलचित्र बनाउँने सोच बनाइरहेकी छु । तर, मैले बनाउँने चलचित्रको कथावस्तु एकदमै राम्रो हुनुपर्छ ।’
हाल आफू अभिनीत पहिलो चलचित्र ‘सुर्या : द पावर’ को प्रमोशनमा व्यस्त रहेकी यी गायिका तथा अभिनेत्रीले ‘सुर्याः द पावर’ बाट धेरै अपेक्षा नगरेको सुनाइन् । उनले भनिन्, ‘यो मेरो पहिलो चलचित्र हो । त्यसैले यस चलचित्रबाट खाशै धेरै आशा गरेकी छैन ।’ लभस्टोरी फिल्ममा अभिनय गर्ने इच्छा रहेको पनि सुजाताले बताइन् ।
अभिनयमा भन्दा गायन र मोडलिङलाई प्राथमिकता दिँदै आएकी सुजाताका अनुसार ‘सुर्याः द पावर’ साउथ इण्डियन शैलीको चलचित्र हो । चलचित्रमा लभस्टोरीका अलावा भरपूर्ण एक्शन देख्न पाइनेछ । गणेश केसी निर्देशित ‘सुर्याः द पावर’ मा सुजाताको मुख्य भूमिका छ । यो चलचित्र १७ असारमा रिलिज हुँदैछ ।
केही गीति एल्बम दर्शक तथा श्रोतालाई दिइसकेकी सुजाताले थुप्रै गीतमा मोडलिङ गरिसकेकी छन् । उनले गायन र मोडलिङबाट श्रोता तथा दर्शकको मन जित्न समेत सफल हुँदै आएकी छन् । यसैबेला उनी अभिनीत चलचित्र रिलिज हुन लागेको हो । आफू अभिनीत चलचित्र रिलिजको संघारमा आएपछि उनी एक किसिमले प्रमोशनमै अल्मलिएकी छन् । सुजाताले भनिन्, ‘चलचित्र रिलिजको दिन आइसक्यो तर, सोचेजस्तो प्रमोशन गर्न सकिएको छैन । खै कसरी गर्ने होला ?’ उनले रहरै–रहरमा ‘सुर्याः द पावर’ मा अभिनय गरेको सुनाउँदै भनिन्, ‘यो चलचित्रमा मिहिनेत त गरेकी छु । तर, सोचेजस्तो गर्न सकेकी छैन । त्यसैले यो चलचित्र मेरो करिअरकै भ¥याङ बन्छ भन्ने पनि लागेको छैन । तर, म यस क्षेत्रमै निरन्तर हुनेछ ।’
