काठमाडौं । चलचित्र ‘हाउ फन्नी’ को बुधबार साँझ राजधानीस्थित कुमारी सिनेमा हलमा प्रिमियर गरिएको छ । रिलिजको एकदिन अगाडि गरिएको प्रिमियरमा सञ्चारकर्मी, कलाकार तथा विभिन्न व्यक्तित्वले चलचित्र हेरेका थिए । यो चलचित्र यो शुक्रबार देशव्यापी रिलिज हुँदैछ ।
पूर्वमिस नेपाल माल्भिका सुब्बा कार्यकारी निर्मात्री रहेको यस चलचित्रलाई निलु डोमा शेर्पाले निर्देशन गरेकी हुन् । निलुको यो डेब्यु निर्देशन हो । उनले आफ्नो डेब्यु निर्देशन चलचित्रबाट आशावादी रहेको बताइन् । ‘चलचित्र दर्शकले रुचाइदिनेछन् भन्ने अपेक्षा गरेकी छु’, प्रिमियरपछि निर्देशक निलुले भनिन्, ‘यस चलचित्रका लागि मिहिनेत पनि गरेका छौं ।’
कार्यक्रममा चलचित्रकी अभिनेत्री प्रियंका कार्की आकर्षक बनेकी थिइन् । विशेषगरी प्रियंकाले लगाएको पहिरनले फोटो पत्रकारको ध्यान तानेको थियो । कार्यक्रममा प्रियंका ह्वाइट गोल्डेन कलरको गाउनमा थिइन् ।
चलचित्रको प्रिमियरमा कार्यकारी निर्माता माल्भिका भने आइनन् । पहिलो सन्तानकी आमा बन्न लागेकाले उनी कार्यक्रममा सहभागी हुन नसकेकी हुन् । तर, यसअघिका हरेक कार्यक्रममा उनी सहभागी हुँदै आएकी थिइन् । ‘हाउ फन्नी’ रिलिज मिति र माल्भिकाको डेलिभरी डेट करिब सँगसँगै रहेको छ । यो कुरा उनले अघिल्लो पत्रकार सम्मेलनमै जानकारी गराएकी हुन् । माल्भिकाले ‘हाउ फन्नी’ लाई समेत आफ्नो सन्तानको रुपमा लिँदै भनिन्, ‘मलाई दुवै बच्चा प्यारो छ, त्यसैले दुवैको केयर गरिरहेकी छु ।’
चलचित्रमा प्रियंका कार्की र केकी जासुसको भूमिकामा देखिँदैछन् । हास्यप्रधान यस चलचित्रको लेखन शान बस्न्यातले गरेका हुन् भने निर्माण आङनुरु शेर्पा (फेरिचे), छिरिङलामु शेर्पा र निमाटासी शेर्पाको रहेको छ । चलचित्रमा दयाहाङ राई, प्रियंका कार्की, केकी अधिकारी, निशा अधिकारी, अनुपविक्रम शाही, विजय बराल, शिशिर राणालगायातको अभिनय रहेको छ । तस्बिर : सुनिल राजभण्डारी/स्क्रीन नेपाल
