काठमाडौं । गीतकार इशा लावती लिम्बूको नयाँ अर्को पनि म्युजिक भिडियो सार्वजनिक भएको छ । इशाको ‘इशा’ एल्बममा संगृहीत ‘भेटैमा भयो आम्बी भज्याङ डाँडा…’ बोलको गीतलाई भिडियोमा सार्वजनिक गरिएको हो । यस गीतमा नेपाली सांगीतिक क्षेत्रका भर्सटायल गायक राजेशपायल राईले स्वर दिएका छन् । राजेशले यस गीतमा आफ्नो भर्सटायल गायकी क्षमता प्रस्तुत गरेका छन् । अशोक लोहारुङ राईको संगीत रहेको ‘भेटैमा भयो…’ पुर्वेली लोकभाकामा गाइएको छ । गीतको भावअनुसार भिडियोमा लिम्बू कला र भेषभूषामा मोडल बबिता फोम्बो लिम्बू र राज खेम्दीङले अभिनय गरेका छन् । लिम्बू पहिरन र गरगहनामा बबिता निकै खुलेकी छन् । यस म्युजिक भिडियोलाई लोकेन साँवाले निर्देशन गरेका हुन् । भिडियोमा पुर्वी नेपालको सुन्दर दृश्य देख्न सकिन्छ ।