काठमाडौं । नेपाली चलचित्रमा ‘राते काइँला’ उपनामले चर्चित अभिनेता सुनील थापा अन्तर्राष्ट्रिय मञ्चमा ‘लाइफटाइम एचिभमेन्ट अवार्ड’द्वारा सम्मानीत भएका छन् । पछिल्लो समय बलिउडमा समेत आफ्नो अभिनय क्षमता देखाइसकेका थापालाई उनको चलचित्र क्षेत्रप्रतिको योगदानलाई कदर गर्दै सन्फ्रान्सिकोमा आयोजित ‘लाइफटाइम एचिभमेन्ट अवार्ड’बाट सम्मानित गरिएको हो ।
उक्त ‘अवार्ड’ अमेरिकास्थित नेपालीले दुई दशकदेखि आयोजना गर्ने गर्दै आएको ‘फेस्टिबल अफ ग्लोब’ मा प्रदान गरिँदै आएको हो । अभिनेता थापासँगै हलिउड कलाकार ज्याकी च्यान र मार्टिन सिन, बलिउड संगीतकार तथा गायक बप्पी लहरी, भियतनामी नायिका किउ चिनलाई पनि सोही ‘अवार्ड’बाट सम्मानित गरिएको छ । यस महोत्सवमा पहिलोपटक नेपाली चलचित्र तथा कलाकारले सहभागिता जनाएका थिए ।
महोत्सवमा शंकर बिसीको नृत्य निर्देशनमा नायिका केकी अधिकारी र नन्दिता केसीले नेपाली लोकलयमा आधारित नृत्य प्रस्तुत गरेक थिए । नेपाली मौलिक लोकधुन र फिल्मी गीतसहितको ७ मिनेट लामो नृत्यमा स्थानीय नेपाली कलाकरसमेत प्रस्तुत गरे । नायिका केकी अधिकारीले विश्वभरमा फिल्मकर्मीसँगको भेटले धेरै सिक्ने मौका पाएको बताएकी छन् ।
