मुम्बई । ओस्कर अवार्ड विजेता संगीतकार एआर रहमान अब फिल्म निर्माणमा पनि देखिने भएका छन् । समाचारमा जनाइएअनुसार एआर रहमानले एक फिल्मको स्क्रिप्ट लेखेका छन्, जसको सुटिङ चाँडै सुरु हुँदैछ ।

अंग्रेजी पत्रिका ‘मुम्बई मिरर’ले जनाएअनुसार रहमानले एक गायकको जीवनमा आधारित रहेर स्क्रिप्ट तयार छन्, जसको नाम ‘९९ सन्ग्स’ रहेको छ । यो फिल्म कला र प्रतिभाको खोजीमा आधारित हुने बताइएको छ ।
केही समयअघि मात्र रहमानले फिल्म ‘तमाशा’ को गीतको कम्पोज गरेका थिए । अहिले उनी आशुतोष गोवारिकरको फिल्म ‘मोहन जोदाडो’ का लागि संगीत दिँदैछन् । यसबाहेक रहमान अब चाँडै आफ्नो फिल्म ‘९९ सन्ग्स’ को सुटिङमा व्यस्त हुँदैछन् । सुरुमा आफ्नो फिल्म आफैले निर्देशन गर्ने उनले सोच बनाएका थिए । तर, व्यस्त भएकाले निर्देशनको जिम्मा विश्वेश कृष्णमूर्तिलाई दिएका छन् । समाचारमा जनाइएअनुसार उक्त फिल्म हिन्दी र अंग्रेजीका अलावा साउथ भाषामा समेत डबिङ हुने छ ।