काठमाडौं । गायिका मनु लिम्बूको मुस्कानमा के जादु छ कुन्नी ? कुनै जादू नभएको भए किन गायक तारा लक्सम लिम्बू लठ्ठै हुन्थे र । ‘तिम्रो मुस्कानमा…’ बोलको गीतमा यस्तै भाव झल्किन्छ । यो गीत सुनेपछि तारा मात्र होइन, पक्कै श्रोता/दर्शक पनि मक्खै हुनेछन् । हामीलाई लाग्छ, मनु र ताराको स्वरमा ‘तिम्रो मुस्कानमा…’ बोलको यो गीत एकपटक हेरेपछि वा सुनेपछि मन नपराउने सायदै हुनेछन् । गायक कमल खत्रीको शब्द तथा संगीत रहेको यस गीतमा मनु र ताराले स्वर दिएका छन् । यस गीतको म्युजिक भिडियोलाई शैलेन्द्र खोखालीले निर्देशन गरेका हुन्  ।

हालै रिलिज गरिएको यस भिडियोमा बेनिश र श्रेया कार्कीलाई फिचरिङ गरिएको छ । गोदाबारी र त्यस आसपासमा यस भिडियोको छायांकन गरिएको यस म्युजिक भिडियोमा एक प्रेम जोडीको रोमान्स एवं सेन्टिमेन्टलाई चित्रण गरिएको छ । निर्देशक शैलेन्द्रकै सम्पादन रहेको यस म्युजिक भिडियोको छायांकन पनि शैलेन्द्रले नै गरेका हुन् । निर्देशन, छायांकन र सम्पादन एकै जनाले गरेकाले पनि होला, गीतको भावअनुसार भिडियो पनि स्तरिय बनेको छ । भिडियो हेर्न तलको लिंकमा क्लिक गर्नुहोला ।