गायक भुवन सुप्तिहाङ राई शुक्रबार अमेरिका उडे । अमेरिका प्रस्थान गरेकै दिन उनले एक म्युजिक भिडियो सार्वजनिक गरेका छन् । भुवनले केही समयका लागि नेपाल छाड्नुअघि ‘छाडि गए आमा तिमीलाई’ बोलको गीत तथा भिडियो सार्वजनिक गरेका हुन् । उनी अमेरिका उड्नु र गीतले ‘छाडि गए आमा’ सार्वजनिक गर्नु एउटा संयोग जस्तै भएको छ ।

गीतले भनेजस्तै उनले आमामात्र नभएर साथीभाई तथा इष्टमित्र नै छाडेर अमेरिका गए । तर, सधैका लागि भने होइन । अमेरिका उड्नुअघि उनले भने, ‘केही समयका लागि मात्र अमेरिका गएको हुँ । म जहाँ भएपनि नेपाली गीतसंगीत र दर्शक तथा श्रोतालाई माया गरिरहने छु किनकि उहाँहरु नै मेरा प्रेरणा र हौसला हुन् ।
भुवनको यो पछिल्लो गीतमा स्व. कुमार कान्छाको स्वर रहेको छ । सन्देश सङमेनको शब्दरचना रहेको यस गीतलाई भुवनले संगीत गरेका हुन् । गायन, संगीत र गीति लेखनमा उस्तैगरी जम्दै आएका भुवनको पछिल्लो रिलिज भिडियोमा दिक्पाल कार्की र उमेश राईको अभिनय रहेको छ । ‘फुःलेन्देको आमा’ का उपमाले पछिल्लो समय चिनिएका उमेशले भिडियोमा आमालाई भूमिका गरेका छन् ।
कृष्ण आचार्यले निर्देशन गरेको यस भिडियोलाई युवराज राई ‘बिरबहादुर’ले खिचेका हुन् भने सम्पादन भरत रेग्मीले गरेका हुन् । यो भिडियो तथा गीत सम्भनः स्व कुमार कान्छाको अन्तिम हुनसक्छ ।