यसरी गर्नुपर्छ : ऋचालाई सिकाउँदै निर्देशक खोखाली ।
काठमाडौं । दशैंको अवसरमा पारेर गायक सुमन कोयुले आफ्नो नयाँ गीतको म्युजिक भिडियो सार्वजनिक गरेका छन् । गायक सुमनले आफ्नो तेस्रो एल्बम ‘नाम’ को ‘अचार करेली’ बोलको गीतको भिडियो सार्वजनिक गरेका हुन् । शैलेन्द्र खोखालीले निर्देशन गरेको सो भिडियोमा नायिका ऋचासिह ठकुरी र गायक सयंमले मोडलिङ गरेका छन् ।
उक्त म्युजिक भिडियोको छायांकन सिन्धुपाल्चोकको विभिन्न रमणीय स्थानमा गरिएको छ । गीतको मागअनुसार सिन्धुपाल्चोकमा छायांकन गरिएको निर्देशक शैलेन्द्रले बताए । म्युजिक भिडियो रिलिजसँगै गायक सुमनले यसपालीको दशैं राजधानीमै मनाउने योजना बनाएका छन् । यसअघि ‘मायालुको यादहरु’ र ‘रि–इन्ट्री’ एल्बम ल्याएका सुमनको ‘नाम’ तेस्रो एल्बम हो । उनले दशैं–तिहारपछि एल्बम रिलिज गर्ने बताउँदै भने, ‘म्युजिक भिडियो रिलिज गरेर मात्र एल्बम रिलिज गर्ने सोचले अगाडि भिडियो ल्याएको हुँ ।’
मोरङ, मधुमल्लाका गायक सुमनले भने, ‘प्राय आफ्नै जन्मथलोमा दशैं मनाउने गरेको थिएँ । तर, यसपाली घरका सबै परिवार बाहिर भएकाले काठमाडौमै मनाउने योजना बनाएको हुँ । यदि मिल्यो भने पोखरा जानु पर्ला । नत्र यही नै साथीभाईसँग रमाइलो गरेर दशैं मनाउने योजना छ ।’
