काठमाडौं, १८ चैत । चर्चित -यापर निर्णय श्रेष्ठ ‘एनएसके’ छैटौ एल्बम ‘एक नेपाल–एनएसके स्टायल’ लिएर आएका छन् । साथै, उनका प्रशंसक तथा फ्यानका लागि खुसीको खबर पनि छ । उक्त एल्बमसँगै अब निर्णयलाई ‘पेन ड्राइभ’मा किन्न, सुन्न र हेर्न पाइने भएको छ । शुक्रबार राजधानीको लाजिमपाटस्थित सम्पदा गार्डेन रिर्सोटमा पत्रकार सम्मेलन गरी निर्र्णयले आफ्नो छैटौ एल्बम सार्वजनिक गरेका हुन् । पत्रकार सम्मेलनमा उनले केही दिनपछि आफ्ना सम्पूर्ण गीत तथा भिडियोहरु एउटै पेन ड्राइभमा उपलब्ध हुने बताए ।
गीतसंगीतमा दिनानुदिन डिजिटल मार्केटको वर्चश्व लिइरहेका बेला यी नेपाली चर्चित ¥यापरले पनि श्रोता तथा दर्शकका लागि आफ्ना गीतहरु पेन ड्राइभमा उपलब्ध गराएको बताए । उनका अनुसार १६ जिबी क्यापासिटी भएको पेन ड्राइभमा ३० वटा गीत तथा भिडियो समावेश हुनेछ भने जसको मूल्य नेपाली एक हजार रुपैयाँ रहेको छ ।
एक दशकभन्दा लामो समयदेखि गायनमा सक्रिय निर्णयका थुप्रै चर्चित गीतहरु छन् । ‘गाउँले जीवन’ बोलको गीतमार्फत चर्चामा आएका निर्णयको दिन पनि बित्यो, ह्याप्पी बर्थडे, म नेपाली, मेचीदेखि महाकाली जस्ता चर्चित गीतहरु छन् । पछिल्लो उनको एल्बममा समेटिएका गीतहरु अधिकांश राष्ट्रभावका छन् ।
निर्णय पछिल्लो केही वर्षयता समाजसेवामा पनि सक्रिय छन् । उनले सबैका लागि शिक्षा नारासहित स्कुल–स्कुलमा अभियान सञ्चालन गर्दै आएका छन् । फोटो : तस्बिर स्टुडियो
