काठमाडौं, ३ फागुन । ‘संगै जुनी विताउँने कसम’ खाँदै युवायुवती भ्यालेनटाइन–डेमा रमाउँदै होलान् । यसैबेला गायक निर्मल सुब्बा र गायिका मेलिना राईको स्वर रहेको ‘बितोस् है सारा जुनी सधैसधैं…’ बोल गीतको भिडियो सार्वजनिक भएको छ । पछिल्लो समयकी चर्चित गायिका मेलिना र निर्मलको यस गीतले मायावी संसारमा रमाइरहेका जोडीलाई पक्कै उर्जा दिनेछ ।
यो सार्वजनिक गीत निर्मलको चौथो एल्बमको हो । जुन एल्बम चाँडै रिलिज गर्ने निर्मलले बताएका छन् । संगीत कैलाश क्रान्ती थारु र शब्द सरोज थापाको रहेको यस गीतको भिडियोलाई सागर सुब्बाले निर्देशन गरेका हुन् । यस भिडियोमा चर्चित नृत्यांगना तथा मोडल पार्वती राई र नामोथाङ लिम्बू र तेजबहादुर थारुले अभिनय गरेका छन् । नृत्य निर्देशन नारायण रिजाल र छायांकन राजु कार्कीको रहेको यस भिडियोलाई सम्पादन निशान घिमिरेले गरेका हुन् ।

पाथिभरा च्यानलको व्यबस्थापनमा निर्माण भएको यस गीतको भिडियोका लागि बिनोद लिम्बू ‘माबोहाङ’ले लगानी गरेका छन् ।
करिब एक दशकयता गायन क्षेत्रमा क्रियाशील निर्मलले यसअघि तीन एल्बम श्रोतालाई दिइसकेका छन् । उनको ‘पाथीभरा शिर देखेदेखि’लगायतका गीत चर्चित छन् । पछिल्लो समय विभिन्न कार्यक्रममा समेत व्यस्त रहेको निर्मलले बताए । प्रस्तुत भिडियो पाथिभरा च्यानलले सार्वजनिक गरेको हो ।