काठमाडौं, ५ असोज । गायक रुकमान लिम्बू पछिल्लो समय चर्चामा छन् । ‘हाक्पारे पालाम ख्याली’जस्ता जनजिब्रोमा झुण्डिने गीत गाएपछि रुकमानको चर्चा एकाएक चुलिएको हो । आफ्नो चर्चाको पारो तातिरहेकै उनी मोडलका रुपमा देखिएका छन् ।
गायिका रजिना रिमालद्वारा स्वरबद्ध एक गीतको भिडियो हालै रिलिज भएको छ, जसमा गायक रुकमानलाई मोडलका रुपमा पाइन्छ । ‘झरी जस्तो आँशु झ-यो’ बोलको यस गीतको भिडियोमा रुकमानसँगै सुमी लिबाङले अभनिय गरेकी छन् । सुमी म्यानमारकी हुन्, जो मोडलिङमा रुचि राख्छिन् । यस भिडियोमा गायक रुकमान र सुमीको जोडी राम्रै जमेको छ ।
हुन त रुकमानले यसअघि पनि आफ्नो गीतमा मोडलिङ गरिसकेका छन् । तर, अरु कलाकारको गीतमा भने यो उनको पहिलो मोडलिङ हो । यस गीतको मोडलिङबारे रुकमानले भने, ‘साथीभाईको करले गरेको हुँ ।’ तर, यस भिडियो हेरिसकेपछि रुकमान गायक मात्र नभएर मोडल पनि हुन् भन्दा कुनै फरक पदैन । यस भिडियोलाई निर्देशन, छायांकन र सम्पादन खगेन्द्र पन्धाक लिम्बूले गरेका हुन् ।