काठमाडौं । उनी सानैदेखि गुनगुनाउँथिन् । अरुणा लामाका गीत भनेपछि हुरुक्कै भएर सुन्थिन् र गाउँथिन् उनी । उनै अरुणाका फ्यान कविता राई ‘भूलमा भूल भयो’ भन्दै नेपाली सांगीतिक क्षेत्रमा देखिएकी छन् ।  ‘भूलमा भूल भयो’ कविताको पहिलो एकल एल्बम हो, जुन एल्बम केही दिनमै उनी सार्वजनिक गर्दैछिन् । ‘एल्बमका लागि सबै गीत रेर्कड भइसक्यो’ उनले भनिन्, ‘दुई वटा गीतको म्युजिक भिडियोसमेत गरेकी छु । केही दिनमै एल्बम रिलिज गर्दैछु ।’ एल्बमका गीत रेकर्डिङ भइसकेपछि आफ्नो एउटा इच्छा पूरा भएको उनले सुनाइन् ।

गायनप्रति इच्छा र रहर भएर पनि समयमा एल्बम ल्याउन नसकेको पनि उनी दुखित पनि छिन् । ‘एल्बम गर्छु भन्दा–भन्दै विदेश गएँ’ उनले भनिन्, ‘त्यसैले पनि समयमै इच्छा पूरा गर्न सकिनँ । तर, अब गायनलाई निरन्तरता दिनेछु ।’ पहिलो एल्बम ‘भूलमा भूल भयो’ भए पनि कविताका लागि पहिलो गीत भने होइन । उनी ११ वर्षदेखि नै विभिन्न स्टेज शोहरुमा गाउँने गर्थिन् । केही गायन प्रतियोगिताहरुमा पनि सहभागी जनाएको कविताले सुनाइन् । ‘स्कुलमा हुने हरेक कार्यक्रमहरुमा गाउँने गर्थेँ’ कविताले भनिन्, ‘एनटिभीबाट प्रसारण भएको तिम्रो सुर मेरो गीतमा पनि सहभागी जनाएकी थिएँ ।’

जतिखेरदेखि गीत सुन्न थालिन्, त्यो समयदेखि नै गायिका बन्ने सपना र रहर लिएकी कविता भन्छिन्, ‘मलाई जतिखेर गुनगुनाउँन मन लाग्छ । यो मेरो गायनप्रतिको तिव्र इच्छा हो ।’ आफ्नो रहर पूरा गर्ने एल्बम भएकै कारण उनले ‘भूलमा भूल भयो’ मा कुनै कन्जुस्याई नगरी पैसा खर्च गरेकी छन् । एल्बमको ८ वटा गीतका लागि कविताले करिब १० लाख रुपैयाँ खर्च गरेकी छन् । त्यो १० लाख खर्चबाटै दुईवटा म्युजिक भिडियो पनि भएको उनले सुनाइन् । एल्बममा खर्चिएको लगानी कसरी उठाउने त ? उनी भन्छिन्, ‘खै, कसरी उठाउँने थाहा छैन । लगानी नउठेपनि रहर त पूरा भयो नि त ।’
एल्बम ‘भूलमा भूल भयो’ मा भूलमा भूल भयो, आउ सामु मिठो गीत गाउ, तिमी को हौं, तिमी सुस्तरी, लाखौ आए जस्ता आठ वटा गीत छन् । सुरेश केसी, डिम्पल वनेम र विरेन्द्र राईको शब्दरचना रहेको ती गीतमा ओमप्रकाश राई, सुरेश अधिकारी, निलम रोजु राई र जन्म राइको संगीत रहेको छ ।