काठमाडौं । तिज आउन अझै महिनादिन छ । तर, संगीत बजार तिजको रमझमले छोइसकको छ । यस्तै, गायिका सहिमा श्रेष्ठलाई पनि तिजले छोएको छ । सहिमा ‘तिज राम्रो रमझमले’ भन्दै यु–ट्युबमा छाएकी छन् । यसपालिको तिजमा नेपाली नारीहरुलाई रमझम गराउने उद्देश्यले सहिमाले डान्सिङ बिटमा तिज गीत गाएकी छन्, जसको भिडियो यु–ट्युबमा रिलिज गरिएको छ ।

आफ्नो नयाँ तिज गीतको म्युजिक भिडियो सार्वजनिक गरेपछि सहिमाले भनिन्, ‘नेपाली दिदी–बहिनीहरुलाई तिजमा रमझम गराउन उद्देश्यले गीत ल्याएकी हुँ ।’ सहिमाको यस गीतको भिडियोलाई शिवदर्शन डिजिटलले यु–ट्युबमा सार्वजनिक गरेको हो । सार्वजनिक गरेको २४ घन्टामै राम्रो प्रतिक्रिया पाइरहेको सहिमाले बताइन् । उनका अनुसार डान्सिङ बिट भएकाले श्रोता÷दर्शक पहिलोपटक हेर्दै रुचाएका छन् ।
महेश खड्काको संगीत रहेको ‘तिज राम्रो रमझाले’ मा सहिमालाई सन्दीप न्यौपानेले स्वरमा साथ दिएका छन् । राजधानीको सिनामंगलस्थित विश्रान्ती पार्टी प्यालेसमा छायांकन गरिएको यस भिडियोको कोरियोग्राफी तथा निर्देशन स्मृति तिमल्सिनाले गरेकी हुन् । भिडियोमा सहिमा र सन्दीपले पनि कम्मर मर्काएका छन् ।
‘तिज संस्कृतिक चाडमात्र नभएर पछिल्लो केही वर्षयता नाचागानको पर्वका रुपमा समेत लिन थालिएको छ । त्यसैले तिज गीतमा मैले डान्सिङ बिटलाई जोड दिएकी हुँ’ सहिमाले भनिन्, ‘गतवर्ष पनि मैले डान्सिङ बिटमै तिज गीत ल्याएकी थिएँ । श्रोताले रुचाए पनि ।’
सहिमाले तिज गीत गाउन थालेको पनि गत वर्षबाटै हो । आधुनिक तथा पप गायनमा चर्चामा रहेकी सहिमाले ‘सहिमा’, ‘मस्ती’ र ‘शृंगार’ जस्ता तीन आधुनिक एल्बम ल्याइसकेकी छन् । पहिलो एल्बममा संगृहीत ‘हेरेको हेरै हुन्छ होला म’ गीतमार्फत नेपाली गायनमा चम्केकी सहिमाले भनिन्, ‘पहिले मलाई तिज गीत गाउने रहरै थिएन । तर, जब तिजका बेला विभिन्न स्थानबाट कार्यक्रमका लागि निम्तो आउन थाल्यो । त्यसपछि तिज गीत गाउन थालेकी हुँ ।’ भिडियो हेर्न तल लिंकमा क्लिक गर्नुस् ।