काठमाडौं, २० साउन । गायिका रेश्मा बम्जन सेलो गीत ‘डम्फु र सेलो’को भिडियोमा लिएर आएकी छन् । यो उनको गीत पहिलो गीति एल्बम ‘प्रथमा’मा समावेश छ ।
पद्म कन्या क्याम्पसमा बि. म्युजिक गर्दै गरेकी गायिका बम्जनले आफ्नो गीत तथा भिडियोलाई हालै सार्वजनिक गरेकी हुन् । सिन्धुली लदाभिर पोखरेमा बुबा दर्ज बहादुर बम्जन र आमा आइतमाया तामाङको कोखबाट जन्मिएकी रेश्मा बम्जनले गायन क्षेत्रमा अघि बढेकी छन ।
संगीतकार प्रकाश गुरुङ र चण्डिप्रसाद काफ्लेकी चेली गायिका बम्जन ‘प्रथमा’ लाई बजारमा ल्याउने अन्तिम तयारीमा पनि छिन्।
फूलकुमार बम्जनका शब्द तथा संगीत रहेको उक्त गीतको म्युजिक भिडियोको निर्देशन सोनाम पाख्रिनले गरेका हुन् । भिडियोमा रोशन लामा तथा रोहिणीले अभिनय गरेका छन्। गायिका बम्जनले आफ्नो डेब्यु एल्बम ‘प्रथमा’ मा ६ गीत समावेश गर्ने बताएकी छन्।
गायिका बम्जनले अहिलेसम्म होई च्याङबा, जन्ती लिएर, भुल भए देउ सजाय, च्याङबालाई देखेर लगायत थुप्रै गीतहरुमा स्वर दिएकी छन् । यसै गरी विभिन्न जिल्लामा आयोजित कार्यक्रमहरुमा आफ्नो प्रस्तुति दिदै आएकी छन् ।
