काठमाडौं, १० फागुन । डाक्टर ब्रिजेश मैनालीको ‘यो देश बनाउने जिम्मा कसको हो ?’ बोल भिडियो यु–ट्युब्मार्फत सार्वजनिक गरिएको छ ।
डां मैनालीद्वारा रचित तथा दीपक शर्माद्वारा संगीतबद्ध यस गीतमा प्रताप लामा र सहिमा श्रेष्ठले गाएका हुन् । निलद्वारा निर्देशित यस भिडियोलाई सम्पादन दीप शर्माले गरेका छन् । चक्काजाम बन्द, हड्तालबाट आक्रान्त जनताको मनोभावना समेट्दै सार्बजनिक भएको यो गीतमा एकातर्फ देशको अस्थिर राजनीति, देशमा विद्यमान समस्या अनि जनमानसमा रहेका प्रश्न तथा गुनासोहरुलाई मार्मिक रुपमा उठान गरिएको छ भने अर्कातर्फ देश बनाउन सबै नेपाली एकजुट भएर लाग्नुपर्ने सकारात्मक सन्देश दिन खोजिएको छ ।
म्युजिक भिडियोमा धनी र गरीबबिच असमानता, सहमतिको नाममा हुने निष्कर्षविहिन कोठे बैठकहरु अनि आम जनताले भोग्नुपरेका समस्याहरु, नेपालसंग सम्बन्धित आर्थिक तथा सामाजिक यथार्थलाई निर्देशक निलले निकै सशक्त ढंगले म्युजिक भिडियोमा उतारेका छन् भने अर्कोतर्फ एकआपसका असहमतिका बाबजुदपनि सबै एकैठाउँमा उभिएर देशको बिकासमा लाग्न सकिन्छ भन्ने सकारात्मक सन्देश दिन खोजिएको छ । मनोज थापा, दिप शर्मा, रितेश श्रीवास्तव, शिवकुमार चम्लागाई, लक्ष्मना थापा, शैलेश मणि उपाध्यायस शोभिता पराजुलीलगायतका करिब २० जना कलाकारले यस म्युजिक भिडियोमा आफ्नो भूमिका निभाएका छन् ।