काठमाडौं, २३ माघ । मोडल तथा अभिनेता नरेन खड्का चाँडै चलचित्र ‘मन्दिरा’ मा देखिँदैछन् । अभिनेत्री रेखा थापाको चलचित्रमार्फत अभिनयमा देखिएका नरेन पछिल्लो समय म्युजिक भिडियो मोडलिङमा व्यस्त हुँदै आएका छन् । यसैबेला उनी ‘मन्दिरा’ मा देखिन लागेका हुन् ।
चलचित्र ‘मन्दिरा’ को केही दिन अघि मात्र छायांकन सकिएको बताइएको छ । सम्पुर्ण छायांकन पोखरा र त्यस आसपासमा गरिएको ‘मन्दिरा’ मा नरेन एक लभर व्वायका रुपमा देखिनेछन् । हरि भट्टको निर्माण रहेको यस चलचित्रलाई दीपेश सापकोटाले निर्देशन गरेका हुन् ।
सस्पेन्स ड्रामा चलचित्र भनिएको ‘मन्दिरा’ मा नरेनका अलावा विनिता ओली, विनी पोखरेल, जेबी डिसी, प्रवण भूषाल, लक्ष्मी भूषाललगायतको मुख्य भूमिका रहेको छ ।

नरेनले यस चलचित्रबाट आफू आशावादी रहेको बताएका छन् । दर्जनौ म्युजिक भिडियोहरुमा मोडलिङ गरिसकेका नरेनले केही समय अघिमात्र भारतमा अभिनय प्रशिक्षण गरेर आएका हुन् । हिजोआज पनि उनी चलचित्र अभिनयभन्दा म्युजिक भिडियोमै बढी व्यस्त छन् । तर, नरेनले भने आफूले चलचित्र अभिनयलाई नै बढी प्राथमिकता दिँदै आएको बताए ।