काठमाडौं । गायिका गौरीमाया साउदेन ‘वनेम’को मनमा के छ ? भन्ने बेग्लै कुरा । तर, गीतमार्फत भने उनले आफ्नो मनका कुरा यसरी व्यक्त गरेकी छन् (भिडियो हेर्नुहोला) । बेलायतमा बस्दै आएकी गायिका गौरीमायाले आफ्नो एल्बम ‘स्मृति’भित्रको ‘मनमा कुरा…’ बोलको गीतको म्युजिक भिडियोलाई हालै यु–ट्युब तथा विभिन्न टेलिभिजन च्यानलमार्फत सार्वजनिक गरेकी छन् । पछिल्लो समयका चर्चित संगीतकार ताराप्रकाश लिम्बूको एकल संगीत रहेको ‘स्मृति’ केही साताअघि मात्र सार्वजनिक गरिएको थियो ।

एल्बम सार्वजनिक गर्न गायिका गौरीमाया छोटो समयका लागि काठमाडौं आएकी थिइन् । यतिखेर बेलायतमै रहेकी गौरीमायाको ‘मनमा कुरा…’ बोलको गीतले यतिखेर नेपाली दर्शक तथा श्रोतामाझ विस्तारै चर्चा बटुल्दै गएको छ । रोजी लाबुङ राईको शब्दरचना रहेको ‘मनमा कुरा…’ गीतको भिडियो निर्देशन अर्जुन अधिकारीले गरेका छन् । यस म्युजिक भिडियोमा अभिनेत्री बेनिशा हमाल र मोडल पुष्पलाई फिचरिङ गरिएको छ । गौरीमायाको ‘स्मृति’ अडियो एल्बमलाई रुबुशा क्रियटिभ वर्कस्ले बजारमा ल्याएको हो । गौरीमायाको ‘मनमा कुरा…’ गीतको भिडियो हेर्न तलको लिंकमा क्लिक गर्नुुस् ।