बेइजिङ । चीनको राजधानी बेइजिङको आकाशले बिहीबार रुपरङ बदलेको थियो । चीलजस्तै उडाइएका युद्धविमान, विभिन्न रंगीबिरंगी धुवाँका बुट्टा तथा चिनियाँ राष्ट्रिय झन्डा र लस्करै युद्धपोत ट्याकले बेइजिङको शक्तिशाली रूप झल्काएको थियो । विश्व शक्तिका रूपमा उदाउँदो चीनले बिहीबार विजय दिवस मनाइरँदा संसारले चीनलाई नियालिरहेका थिए । ७० औं विजय दिवसको अवसरमा चीनले बेइजिङमा विशाल सैन्य परेड गर्दै आफ्नो शक्ति विश्वसामु देखाएको हो । चीनले दोस्रो विश्व युद्धमा जापानलाई पराजय गरेको ३ सेप्टेम्बरका दिनलाई विजय दिवसका रूपमा मनाउँदै आएको छ ।

सैन्य परेडमा करिब १२ हजार सेना, दुई सय युद्धविमान, ट्याक तथा मिसाइलहरू प्रदर्शन गरिएको थियो । चीनको यस विशाल विजय दिवसको अवलोकन गर्न रुसी राष्ट्रपति भ्लादिमिर पुटिनसमेत सहभागी थिए । विजय दिवसका अवसरमा चीनले पहिलोपटक ८० प्रतिशतभन्दा बढी सैन्य उपकरण सार्वजनिक रूपमा प्रदर्शन गरेको चिनियाँ सञ्चारमाध्यमहरूले जनाएका छन् । पछिल्लो दशक पूर्वी एसिया क्षेत्रमा व्याप्त तनाव रहेको छ । यसैबेला चीनको सैन्य शक्तिलाई विश्वले नै नजिकबाट नियालेका छन् ।

कार्यक्रमको उद्घाटन चिनियाँ राष्ट्रपति सी जीनपीङले गरेका थिए । चीनको शक्ति प्रदर्शनका रूपमा लिएको यस विजय दिवसमा ३० राष्ट्रका सरकार तथा राष्ट्र प्रमुखहरू उपस्थित थिए । सैन्य प्रदर्शन भइरहँदा बेइजिङ र आसपासका सम्पूर्ण कलकारखाना बन्द गरिएका थिए भने मासु पोल्नसमेत प्रतिबन्ध लगाइएको थियो । सेनाले आकाश र जमिनमा एकैसाथ परेड गरिरहँदा गुडिरहेको कारसमेत रोकिएका थिए । युद्धकलामा उडाइएका युद्ध विमान तथा हवाईजहाजहरूलाई बाधा नपुगोस् भनेर यस्तो गरिएको जनाइएको छ ।

चीनको विशाल सैन्य प्रदर्शनमा रुसी राष्ट्रपति पुटीन, दक्षिण कोरियाली राष्ट्रपति पार्क कन हे र संयुक्त राष्ट्रसंघका महासचिव बानकी मुन सँगै सहभागी भएका थिए । चीनको यस विजय दिवसमा अमेरिका, बेलायत, अस्ट्रेलिया र जापानका प्रतिनिधि भने सहभागी थिएनन् । (एजेन्सीको सहयोगमा)