काठमाडौं  । चलचित्र विकास वोर्डका अध्यक्ष राजकुमार राईले आदिवासी जनजाति चलचित्रको अभिलेख संकलन कार्य सुरु गर्न लागेको बताएका छन् । आदिवासी जनजातिका मातृभाषामा निर्मित चलचित्रहरुको सही अभिलेख नहुँदा राज्यको आँखामा ती चलचित्र पर्न नसकेको भन्दै यथार्थलाई मनन गरी बोर्डले अभिलेख संकलन कार्य सुरु गर्न लागेको अध्यक्ष राईले बताए ।
राजधानी आयोजित २०औं तामाङ चलचित्र दिवसको अवसरमा बोल्दै अध्यक्ष राईले मातृभाषी चलचित्रकर्मीलाई प्रोत्साहन गर्ने नीति बनाउने आश्वासन पनि दिए । त्यसका लागि दर्ता प्रक्रिया, विमा र सेन्सर शुल्कसमेत पुर्नविचार गरिने उनले बताए । मातृभाषी चलचित्रको सेन्सर गर्दा सम्बन्धित भाषाका विज्ञ अनिवार्य व्यवस्था गरिएको जानकारी दिँदै अध्यक्ष राईले हाल लाग्दै आएको शुल्कमा सहुलियत कसरी दिने ? भन्नेबारे छलफल भइरहेको बताए ।

तामाङ चलचित्र संघले आयोजना गरेको कार्यक्रममा संघका अध्यक्ष जेनिश दोङले राज्यको विभेदकारी नीतिले गर्दा मातृभाषी चलचित्रकर्मीको उत्साहलाई रोक्न नसकेको धारणा राखेका थिए । गत आर्थिक वर्षमा मात्र २१ वटा तामाङ चलचित्र निर्माण भएको जानकारी दिँदै दोङले आदिवासी जनजातिका मौलिक संस्कृति, पहिचान र मुद्दामा आधारित भएर निर्माण भएका चलचित्रहरु वास्तविक नेपाली चलचित्र भएको दाबी समेत गरे । तर, वास्तविक नेपाली चलचित्र नै राज्यको आँखामा पर्न नसक्नु विभेदकारी नीतिको उपज भएको उनको भनाइ छ ।
कार्यक्रममा तामाङ चलचित्रका सुरुवाती समयका पाँच चलचित्र निर्देशकलाई विशेष सम्मानबाट सम्मानित गरिएको थियो । सम्मानित हुनेमा पहिलो तामाङ चलचित्रका निर्देशक जयनन्द लामासहित दीपेन्द्र दोङ तामाङ, सञ्जय लामा बल, विकास लामा र सुजन लामा रहेका छन् ।
यस्तै, तामाङ चलचित्रको दुई दशक लामो इतिहासको अभिलेख संकलनमा योगदान पु¥याएवापत तामाङ चलचित्र अभिलेख पुस्तकका लेखक जयनकुमार मोक्तानलाई कदरपत्र प्रदान गरिएको थियो । तामाङ भाषाको पहिलो चलचित्र ‘सेमरी छोरङान’ को विक्रम सम्वत २०५३ साल भाद्र १६ गते पहिलो प्रदर्शनी भएको दिनलाई तामाङ चलचित्र संघले ‘तामाङ चलचित्र दिवस’ का रुपमा मनाउँदै आएको हो ।