फिल्म ‘हाउ फन्नी’ टिम

काठमाडौं । पूर्वमिस नेपाल माल्भिका सुब्बा फिल्मी क्षेत्रमा प्रवेश गरेकी छन् । तर, फिल्मी क्षेत्रमा प्रवेश गरेपनि अभिनय आफ्नो लागि नभएको उनले बताएकी छन् । उनी कार्यकारी निर्माता रहेको फिल्म ‘हाउ फन्नी’ को घोषणा कार्यक्रममा यस्तो बताइकी हुन् । फिल्मको आइतबार राजधानीको लाजिम्पाटस्थित पाँचतारे होटल -याडिसनमा एक कार्यक्रमबीच घोषणा गरिएको हो । कार्यक्रममा बोल्दै पूर्वसुन्दरी माल्भिकाले भनिन्, ‘फिल्मी क्षेत्र प्रवेश गरेको भएपनि अभिनय मेरा लागि होइन ।’

निर्देशक निलु डोमा शेर्पा

‘टिनी बट बिग पिक्चर्सको ब्यानरमा घोषणा गरिएको फिल्मलाई निलु डोमा शेर्पाले निर्देशन गर्ने भएकी छन् । फिल्ममा दयाहाङ राई, अनुपविक्रम शाही, केकी अधिकारी, प्रियंका कार्की र निशा अधिकारी मुख्य भूमिका रहने जनाइएको छ । फिल्मको छायांकन मंसिरको पहिलो साताबाट सुरु हुने निर्माणपक्षले जनाएको छ । एक धनाढ्य परिवारकी छोरी हराएसँगै सुरु हुने फिल्ममा प्रियंका र केकी अधिकारी जासुसका रुपमा देखिनेछन् । उनीहरुले हराएकी केटीको खोजी गर्नेछन् । खोजी कार्य रमाइलो तवरले हुने कार्यकारी निर्मात्री माल्भिकाले बताइन् । उनका अनुसार उपलब्ध सबैखाले स्रोत, साधन र शक्तिको उपयोगपछि पनि हराएकी युवतीको अत्तोपत्तो नलागेपछि परम्परागत सुत्रलाई छाडेर केही फरक बाटो अपनाइने छ ।

फिल्ममा पिंयंका र केकी विल्कुलै नयाँ अवतारमा देखिने जनाइएको छ । फिल्ममा कथा र परिकल्पना निलु डोमा शेर्पा, लेखन शान बस्न्यात, निर्माता आङ नुरु शेर्पा, छिरिङ लामु शेर्पा र निमा टासी शेर्पा रहेका छन् ।